हसणे

मंद स्मित

गौतम बुद्धाचे

करुण हास्य

येशू ख्रिस्ताच्या डोळ्यांचे

लाघवी हसणे

गोड गोंडस बाळाचे

प्रसन्न हास्य

मुरली मनोहर श्रीकृष्णाचे

सलज्ज हसणे

प्रेमी युगुलांचे

हसणे हसवणे

विदूषकाचे

निर्मळ हास्य

मैत्रीतल्या गप्पांचे

जगणे काय असावे

हसणे,

निव्वळ हसणे

दुःखांचे ओझे

हलके करणारे

क्षणा क्षणात

आनंद ओतणारे

अथ पासून इति चा प्रवास

सुखकर करणारे....

प्लास्टिक नावाचा भस्मासुर

प्लास्टिक नावाचा भस्मासुर

एकदा पृथ्वीवर आला

बघता बघता त्याने

हाहाकार केला

प्राण्यांच्या जीवाचे

झाले हाल

पोटात प्लास्टिकचे

गोळे हजार

शांत समुद्र

पार वैतागला

निळ्याशार पाण्यावर

तवंग साचला

एकही जागा

उरली नाही

जेथे प्लास्टिक चा

शिरकाव नाही

पृथ्वी म्हणाली मानवांनो

जागे व्हा जरा

ह्या भस्मासुराला

नेस्तनाबूद करा

प्रत्येक वस्तू

प्लास्टिक च्या

वेसणात घालू नका

माझा अंत पाहू नका

Reduce Reuse Recycle

ची शपथ घ्या

Single use प्लास्टिक

बंद करा

माझ्या लेकरानो

हा भस्मासुर आहे खरा

कदाचित तिसरे महायुद्ध

आलय तुमच्या दारा...

टुणटुण

टुणटुण गेली बाजारी

तिने घेतली नवारी

नवारीचा बुट्टा छान

टुणटुण दिसते गोरी पान

टुणटुण गेली बाजारी

तिने घेतली ज्वारी

ज्वारीची भाकरी थापली

गुटू  गुटू खाल्ली

टुणटुण गेली बाजारी

तिने घेतली फुलवारी

सुंदर फुले खोवली

लाज लाजरी ती झाली

टुणटुण गेली बाजारी

तिला भेटली सई राणी 

सईला दिली भेट

सई एकदम खुशीत

माझी मुलगी !

हसरी माझी मुलगी

खिदळ्त राहते

हाहा हीही हाहा हीही

रडकी माझी मुलगी

रडत राहते

क्यांव क्यांव क्यांव क्यांव

शेंबडी माझी मुलगी

शेंबूड काढ्ते

फर फर फर फर

पादरी माझी मुलगी

पादत राहते

पू पू पू पू

बुटकी माझी मुलगी

जंप मारते

हाय हाय हाय हाय

शहाणी माझी मुलगी

अंगण झाडते

झर झर झर झर

गोड माझी मुलगी

सोनुली गोजिरी

लाज लाजरी बाहुली

कुशीत येते पटकन

डोळे तिचे सांगून जातात

काहितरी झटकन ...

बालगीत

पंखा फिरतो गर गर

सई चालते भर भर

मांजर म्हणते म्याऊ म्याऊ

सई तिला देते खाऊ

कुत्रा म्हणतो भु भु  

सई म्हणते छू छू

ढोल वाजतो ढम ढम

सई करते मम्म

पाउस पडतो रपरप

सई खाते गप गप

चिमणी करते च्यू च्यूू

सई च्या डोक्यात झाली ऊ

गाढव म्हणतो ढॅंचू

सई करते शॅंपू

चटकदार लागते भेळ

सई दमते खेळुन खेळ

आई म्हणते अंगाई

सई करते गाई गाई ...